Qazaxda sevdiyi qıza başını bulayanı “söhbətə” çağıran 18 yaşlı şəxs bıçaqlanıb.
Gencexeber.az-ın əldə etdiyi məlumata görə, hadisənin istintaqı Gəncə Ağır Cinayətlər Məhkəməsinin hakimi Mikayil Məmmədzadənin sədrliyi ilə keçirilib.
Belə ki, 2006-cı il təvəllüdlü Əli Məmmədovla (ad şərtidir) 2008-ci il təvəllüdlü Nihad Əsgərov (ad şərtidir) arasında telefon yazışması zamanı söz mübahisəsi yaranıb. Mübahisəyə səbəb Əlinin sevgilisi olan Nəzrinə Nihadın baş bulaması olub. Məsələni həll etmək üçün parkda görüşən gənclərin mübahisəsinin sonu qanla bitib. Nihad özünü qorumaq üçün üzərində gətirdiyi bıçaqla Əlini vurub.
Nihad Əsgərov Azərbaycan Respublikası CM-nin 126.1-ci (insan həyatı üçün təhlükəli olan qəsdən sağlamlığa ağır zərər vurma) maddəsi ilə təqsirləndirilib.
Məhkəmədə təqsirləndirilən şəxs qismində dindirilən Nihad Əsgərov özünü qismən təqsirli bilib və ifadəsində bunları deyib:
“Qazax Dövlət Sosial-İqtisadi kollecində dərsdə olarkən qrup yoldaşlarımdan kimsə Əlinin mənimlə danışmaq istədiyini deyib. Mən də problem olmadığını, görüşəcəyimi bildirdim. “Dədə Qorqud” parkına gedib Əli ilə görüşdüm. Əli mənə sinfə daxil olarkən qrup yoldaşı Nəzrinə baxıb başımı buladığımı dedi. Bunun doğru olmadığını bildirdim. Əli parkın arxasına keçməyi təklif elədi. Buna ehtiyac olmadığını bildirdib getdim. Növbəti dərsdə qrup yoldaşım Amin gəlib dedi ki, kollecdə söhbətlər yayılıb. Deyirlər ki, sən Əlidən qorxub geri çəkilmisən. Bunun yalan olduğunu deyib, Əlinin nömrəsini axtardım. Əliyə yazıb, aramızda olan məsələnin niyə hamıya dediyini soruşdum. Daha sonra onu dəvət etdim danışmağa. Əli razı olmadı. Mənə “utanmırsan, səndən yaşca böyüyəm, mənə uşaq deyirsən, mənimlə bu tərzdə danışmağın doğru deyil” dedi.
Əli görüşməyə razı olmadı. Dedi, sabah görüşərik. Razılaşdım. Görüşəndə də mübahisəmiz yarandı. Cibimdə gətirdiyim bıçaqla onu vurdum. Amma vurmağımdan xəbərim olmadı. Bir də gördüm ki, Əlinin qarnından qan gəlir”.
Məhkəmə baxışı zamanı iş üzrə zərərçəkmiş şəxs qismində dindirilən Əli Məmmədov ifadəsində deyib:
“Qazax Dövlət Sosial-İqtisadi Kollecində oxuyuram. Nəzrinlə aramızda sevgi münasibəti olub. Bir gün Nihadın Nəzrinlə zarafatlaşdığını gördüm. Mən də Nihadın qrup yoldaşı ilə söz göndərdim ki, onla danışım. Həmin gün kollecin qarşısında Nihad ilə qarşılaşdım və “Dədə Qorqud” parkına gedib söhbət etmək istədiyimi dedim. Ondan Nəzrin barədə xoşa gəlməz söz deyib-deməməsini soruşdum. Demədiyi barədə and içdi. Mən də məsələni bağlayıb getdim.
Bir müddət sonra Nihad mənə yazıb başqalarına bu barədə danışdığımı soruşdu. Mən də “nə deyirsən ə, körpə?” deyə mesaj yazdım. Nihad da “körpə sənsən, özündən böyüyə körpə deməyə utanmırsan” deyə yazdı. Nihada dedim ki, sabah görüşüb danışarıq. Səhəri gün söhbət zamanı Nihada yumruq vurdum. O da cibindən bıçağı çıxarıb mənə vurdu”.
Tərəflərin çıxışından sonra məhkəmə müşavirəyə yollanıb. Sonda məhkəmənin qərarı ilə Nihad Əsgərov 3 il azadlıqdan məhrum edilib.
Fidan İlqar
