Fövqəladə Hallar Nazirliyinin aidiyyəti qurumları tərəfindən fövqəladə hallarla bağlı davranış qaydaları barədə əhalinin maarifləndirilməsi məqsədilə silsilə tədbirlər keçirilib.
Gencexeber.az-a bu barədə FHN-in Mətbuat Xidmətindən məlumat verilib.
Bildirilib ki, FHN-in Gəncə Regional Mərkəzi tərəfindən Qazax şəhər S.Vurğun adına 2 nömrəli tam orta məktəbində və Gəncə şəhər Fizika, riyaziyyat və informatika təmayüllü liseyində, Qarabağ Regional Mərkəzi tərəfindən Bərdə rayonu, Alpoud kənd tam orta məktəbində və bölgələrdəki bəzi məktəblərdə də Dövlət Yanğın Nəzarəti Xidmətinin təşkilatçılığı ilə TƏBİB-in tabeçiliyndə Bakı Baş Səhiyyə Mərkəzində maarifləndirmə tədbirləri keçirilib.
Tədbirlərin keçirilməsində məqsəd mümkün təbii və texnogen xarakterli fövqəladə hadisələrlə bağlı zəruri davranış qaydaları barədə vətəndaşlara müvafiq biliklərin verilməsi olub.
Tədbirlərdə fövqəladə halların təsnifatı, ölkəmiz üçün xarakterik olan fövqəladə hallar, o cümlədən yanğınların başvermə səbəbləri və bu zaman zəruri davranış qaydaları barədə ətraflı məlumat verilib, FHN-in “112” qaynar telefon xəttinin təyinatı izah olunub, sularda təhlükəsizliklə bağlı məsələlər diqqətə çatdırılıb və ilkin yanğınsöndürmə vasitələrindən istifadə qaydaları əyani şəkildə nümayiş etdirilib.
