Bu gün artıq Ramazan ayının yarısı tamamlanıb. 28, 30 mart, 1 və 5 aprel tarixlərinə müsəlmanlar üçün vacib olan Qədr gecələrinin təsadüf edəcəyi bildirilir.
Bununla bağlı Gəncəxəbər.az redaksiyası olaraq, Qədr gecəsi yerinə yetirilməsi tövsiyə olunan əməllərin siyahısını hazırladıq. Həmin əməlləri təqdim edirik:
- Qüsl almaq. Gün batandan sonra Qədr gecəsinin qüslünü almaq;
- Əhya saxlamaq. Həmin gecələr sübh azanına kimi oyaq qalmaq. Əhya gecənin ən mühüm əməllərindən sayılır. Digər əməllər görülməsə də, təkcə əhya saxlamaq savabdır;
- Quran oxumaq;
- Qədr gecəsinin namazını qılmaq. Namaz “Qədr gecəsinin namazı” niyyəti ilə qılınır və sübh namazı kimi iki rükətdən ibarətdir. Lakin hər rükətdə “Fatihə” surəsindən sonra yeddi dəfə “İxlas” surəsi deyilir. Namazdan dərhal sonra səcdəyə gedib 70 dəfə “Əstəğfirullahə və ətubu ileyh” (Allahdan üzr diləyir və Ona tərəf qayıdıram) deyilməlidir;
- 100 rükətli namaz qılmaq. “Qədr gecəsinin namazı” niyyəti ilə 50 dəfə iki rükətli namaz qılmaq. Qəza namazı olanlar 6 günün qəza namazlarını qıla bilərlər;
- İstiğfar və tövbə etmək. Yüz dəfə “Əstəğfirullahə rəbbi və ətubu iləyh” demək də olar;
- İnsanları bağışlamaq və haqqını halal etmək;
- Peyğəmbərə (s) və Əhli Beytə (ə.s) çoxlu salavat göndərmək: “Allahummə salli əla Muhəmməd və ali-Muhəmməd”;
- Sədəqə vermək;
- Quranı açaraq qarşınıza qoyub “Allahummə inni əs’əlukə bi kitabikəl-munzəli və ma fihi və fihi ismukəl-əkbəru və əsmaukəl-husna və ma yuxafu və yurca ən təc’ələni min utəqaikə minənnar” (İlahi, Səni and verirəm nazil etdiyin Kitaba və onun içində olanlara – ən uca adına, bütün gözəl adlarına, qorxmalı və ümid bəslənməli şeylərə – məni cəhənnəm atəşindən azad et) duasını oxumaq və sonra Allahdan hacətini diləmək;
- Cövşən-Kəbir duasını oxumaq;
- İmam Əlinin (ə.s) ziyarətnaməsini oxumaq;
- İmam Hüseynin (ə.s) ziyarətnaməsini oxumaq;
- İmam Zamanın (ə.s) zühurunun tezləşməsi üçün çox sayda Fərəc duasını oxumaq.
