Azərbaycan Respublikasının ilk Baş prokuroru İsmət Qayıbovun doğulduğu və qırmızı kərpicdən tikilmiş bina zədələnib.
Gencexeber.az məlumat verir ki, İsmət Qayıbov küçəsində yerləşən bu binanın damından düşən kərpic parçaları yoldan keçənlərin təhlükəsizliyini təhdid edir. Eləcə də, memarlıq abidəsinin xarici görünüşündə qüsurlar əmələ gəlib.
Məsələ ilə bağlı yerli sakin Sevinc Tağıyeva redaksiyamıza şikayət ünvanlayaraq bildirib ki, normaya uyğun budanmayan çinarların budaqları güclü külək zamanı binanın fasadını və damını zədələyir.
S.Tağıyeva iddia edir ki, XIX əsrə aid yerli əhəmiyyətli binanın görünüşünü bərpa etmək məqsədilə zəruri təmir işlərinin aparılması və ağacların budanması ilə bağlı Gəncə şəhər İcra Hakimiyyətinə, həmçinin Bakı Memarlıq İdarəsinə ərizə ilə müraciət edib. Lakin bütün müraciətlər cavabsız qalıb, problemin aradan qaldırılması üçün heç bir tədbir görülməyib.
Onu da vurğulamaq lazımdır ki, Gəncədə binaların və digər tikililərin fasadlarında qüsurlar yeni problem deyil. Şəhərdə, xüsusilə Heydər Əliyev və Nizami prospektlərində qırmızı kərpiclə üzlənən bir sıra təhlükəli tikililər var ki, bu da sakinlərin ciddi narahatlığına səbəb olur.
Qeyd edək ki, cari ilin oktyabr ayında Gəncədə kişi sayıqlığı sayəsində binalardan birinin damından düşən fasad qırıntılarından yayına bilib.
2022-ci ilin martın 19-da isə Nizami Gəncəvi prospektində güclü külək nəticəsində yolun kənarında dayanan ana və azyaşlı qızının üzərinə evin divarına çəkilmiş üz daşları tökülüb.
