Bu gün şəhid Saleh Məsimovun doğum günüdür.
Saleh Əliyar oğlu Məsimov 19 aprel 1977-ci ildə Qərbi Azərbaycanın Güllübulaq kəndində anadan olub. 1988-ci ildə o, valideynləri ilə birlikdə Gəncə şəhərinə köçüb. Burada 9 saylı orta məktəbdə təhsil alıb və məktəbin 9-cu sinfini bitirdikdən sonra 20 nömrəli texniki-peşə məktəbində dülgərlik peşəsinə yiyələnib.
Saleh Məsimov 1995-ci ilin mayında həqiqi hərbi xidmətə çağırılıb. O, 181 saylı hərbi hissənin tərkibində xidmət etməyə başlayıb. Ağdam-Füzuli bölgəsində vuruşub.
30 oktyabr 1996-cı ildə ağır yaralanaraq Bakı şəhər hospitalına aparılıb, 7 gün xəstəxanada qalıb əməliyyat olunsa da, həkimlər həmyerlimizi həyata qaytara bilməyiblər. Saleh Əliyar oğlu Məsimov aldığı güllə yarasından xəstəxanada vəfat edib. O, Gəncə şəhərinin Şəhidlər xiyabanında dəfn olunub.
