Gəncədə binalardan birinin damından iri dəmir parçası asılı vəziyyətdə qaldığı üçün sakinlər həyəcan təbili çalır.
Gencexeber.az məlumat verir ki, Heydər Əliyev prospektində yerləşən 159 nömrəli çoxmənzilli binanın damından iri dəmir parçası sallanıb. Sakinlərin sözlərinə görə, bu vəziyyət bir neçə aydır davam edir. Bundan başqa, binanın fasadının hissələri qoparaq piyada səkisinə düşür.
Sakinlər şikayət edirlər ki, vətəndaşların təhlükəsiz gediş-gəlişini təmin etmək üçün uzun müddətdir ki, şəhərin mərkəzində yaşanan bu vəziyyətin həlli istiqamətində aidiyyəti qurumların heç biri tədbir görməyib.
"Hər dəfə binanın yanından keçəndə qorxuram ki, bu parça mənim və ya başqasının üstünə düşə bilər. Tikilinin üzlük hissələri də qopub yerə düşür”, - sakin bildirib.
Onu da vurğulamaq lazımdır ki, Gəncədə binaların və digər tikililərin fasadlarında qüsurlar yeni problem deyil. Şəhərdə, xüsusilə Heydər Əliyev və Nizami prospektlərində qırmızı kərpiclə üzlənən bir sıra təhlükəli tikililər var ki, bu da sakinlərin ciddi narahatlığına səbəb olur.
Hətta bu səbəbdən 2022-ci ilin martın 19-da Nizami Gəncəvi prospektində xoşagəlməz hadisə də baş verib. Güclü külək nəticəsində yolun kənarında dayanan ana və azyaşlı qızının üzərinə evin divarına çəkilmiş üz daşları tökülüb. Həmin şəxslər ağır vəziyyətdə xəstəxanaya çatdırılıb.
